مبارك عليكم الشهر

شلونكم يا فؤادي عساكم طيبين ؟
يغربل بليسكم ولا احد فيكم سأل عني
ما علينا أهم شي مبارك عليكم الشهر شهر الخير والطاعة والمغفره ان شاء الله
وعسى تتحقق امانيكم وتضاعفون الاجر بهالشهر ان شاء الله
السالفة تقوووول
سنه من السنين برمضان كنت في بيت خالي العب مع بنتهم بزر حزتها كنت ام تسع سنين بس كانو يصومونا اهلنا دخلت الصاله في بيتهم ولا بنت خالي العوده قاعده وحاطه القنجه جدامها بعز الظهر طبعا انا عيوني الثنتين صارو حيول من كثر ما طلعو من مكانهم وناشبتها نشبه اول ما صرخت صرخه فاااااااااااااااااطره ليش فااااااااااااااطره يا جلب رمضان يعني منكر حزتها اللي شفته هههههههه وتعقبتها بالاسئله ليش مو صايمه وشحقه فاطره والناس رمضان وشلون ما تخافين من الله وهذا وانتي ابوج مطوع وحافظه القرآن وانتي كبيره واحنا يهال وصايمين ليش جذيه طبعا البنت كانت اكبر مني بست سنين يمكن بس خبركم انا كان لساني يلوط اذاني شويونه مو وايد وهات يا اسئله
بعد اهي الخبله اي قولي مريضه قولي شي ساكته وتتضحك المهم هديتها ورحت العب مع اختها اللي من طقتي ونادونا تالي عشان نسلم على خالي العود اللي اهو عمهم دخلنا نسلم وحده وحده ويسألنا ها صايمه ها يوعانه يالله ما بقى شي يوم يا دورها جان يقول لها ها بنيتي شلونج مع الصيام صايمه؟ جان تقول اي
اهي قالت اي
ما بغت إلا عمرها وانهال عليها بالفضايح
يا الجذابه ما عليك منها خالي ترى جذابه توها قبل شوي حاطه القنجه جدامها وكت كيت وذاك وذي تحسون ياهل صايم وحرمصوه عالاكل هههههه
اشوفه يتبوسم واهي ويها قام يقط الوان ما طول وطلع واستلموني الكبار زف شلون تقولين جذيه وانا عند ربي صاجه البنت مو صايمه ليش تجذب وعصبت ورديت بيتنا مشي لانهم زفوني
وما فطنت على الهباب اللي هببته إلا بعدها بجم سنه
ليلحين ماني قادرة انسى الموقف
والحين خل ادق على عيالها اقول لهم القصه